Parish History

     ವಿಟ್ಲ ಫಿರ್ಗಜ್ ಸುರ್ವೆರ್ ಏಕ್ ಕೊಪೆಲ್ ಜಾವ್ನ್ ಮೊರ್ಗಾನಾಡ್, ಉಪ್ರಾಂತ್ ಪುತ್ತೂರ್ ಆನಿ ಬರಿಮಾರ್ ಫಿರ್ಗಜೆಚಾ ಆಡಳ್ತಾಖಾಲ್ ಆಸ್ಲಿ ತರ್, 1923 ಜೂನ್ 1 ತಾರಿಕೆರ್ ಏಕ್ ಸ್ವತಂತ್ ಫಿರ್ಗಜ್ ಜಾವ್ನ್ ಸ್ಥಾಪನ್ ಜಾಲಿ. ತ್ಯಾ ನಂತರ್ ಸಬಾರ್ ಯಾಜಕಾಂಚಾ, ಧಾರ್ಮಿಕಾಂಚಾ ಆನಿ ಲಾಯಿಕ್ ಮುಕೆಲ್ಯಾಂಚಾ ಗೊವ್ಳಿಕ್-ಸಾಮಾಜಿಕ್ ಸೆವೆ ವರ್ವಿಂ ಪಾಟ್ಲ್ಯಾ ಶೆಂಭರ್ ವರ್ಸಾಂನಿ ಜಾಯ್ತಿ ಪ್ರಗತಿ ಅಪ್ಣಾವ್ಕ್ ಪಾವ್ಲ್ಯಾ. ವಿಟ್ಲ ಫಿರ್ಗಜೆಚೊ ಲೋಕ್ ಸುರ್ವೆರ್ 7 ವಾಡ್ಯಾಂನಿ ಸರಿಸುಮಾರ್ 20 ಕಿ.ಮಿ ವ್ಯಾಪ್ತಿರ್ ವಸ್ತಿ ಕರ್ನ್ ಆಸ್‌ಲ್ಲೊ ತರ್ ಕ್ರಮೇಣ್ ಪೆರುವಾಯ್, ಮನಿಲಾ ಆನಿ ದೆಲಂತಬೆಟ್ಟು ಕೊಪೆಲಾಂ ಸ್ವತಂತ್ ಫಿರ್ಗಜ್ಯೊ ಜಾವ್ನ್ ಭಾವಾರ್ಥ್ ವಾಡ್‌ಲ್ಲ್ಯಾಕ್ ಸಾಕ್ಸ್ ಜಾವ್ನ್ ಆಸಾತ್. ಪ್ರಸ್ತುತ್ 13 ವಾಡ್ಯಾಂನಿ 335 ಕುಟ್ಮಾಂಚೆ 1325 ಲೋಕ್ ಭಾವಾರ್ಥಿ ಜಿಣಿಯೆಂತ್ ಉರ್ಬೆನ್ ಸಾಕ್ಸ್ ದಿತಾತ್.

     ಸಾಂ. ರೀತಾಚಾ ಮಾನಾಕ್ ಸಮರ್ಪಿಲ್ಲೆಂ ಕನ್ನಡ ಆನಿ ಆಂಗ್ಲ ಮಾಧ್ಯಮ್ ವಿದ್ಯಾಸಂಸ್ಥೆ ಕ್ರಿಸ್ತಾಂವ್ ತಶೆಂ ಅಕ್ರಿಸ್ತಾಂವ್ ಭುರ್ಗ್ಯಾಂಕ್ ಕ್ರಿಸ್ತಿ ಮೌಲ್ಯಾಂನಿ ಭರ್‌ಲ್ಲೆಂ ಆಧುನಿಕ್ ಶಿಕಾಪ್ ದಿಂವ್ಚೆ ಮುಖಾಂತ್ ಕ್ರಿಸ್ತಿ ಭಾವಾರ್ಥಾಚೆಂ ಹಾಜರ್ಪಣ್ ಆನಿ ಪರ್ಜಳ್ ಫಾಂಕಾವ್ನ್ ಆಸಾತ್. ಕೊರೊನಾ ಆನಿ ಹೆರ್ ಆರ್ಥಿಕ್ ಅಡ್ಚಣೆಂ ಮಧೆಂಯ್ ಜಯ್ತ್ ಸಭಾ ಸಾಲ್ ಉಬೆಂ ಕೆಲ್ಲೆಂ ವಿಟ್ಲಗಾರಾಂಚೆ ವಡ್ಲೆಂ ಸಾಧನ್. ತ್ಯಾ ಪಟಾಪಟ್ ಫಿರ್ಗಜೆಚೊ ಶತಮಾನೋತ್ಸವ್ ಜುಬ್ಲೆವ್ ಆನಿ ತ್ಯಾ ಸಂಬಂಧಿ ಇಗರ್ಜೆಚಾ ಗರ್ಜೆಚಾ ನವೀಕರಣ್ ಯೋಜನಾಂ ಪಾಸತ್ ಪರತ್ ಫಿರ್ಗಜ್ಗಾರಾಂನಿ ದಾಕಯಿಲ್ಲೆಂ ಉದಾರ್ ಮನ್ ಆನಿ ಭೆಟಯಿಲ್ಲಿ ನಿಸ್ವಾರ್ಥ್ ಸೆವಾ, ಸರ್ತೆ ವಾವ್ರ್ ಹೊಗ್ಳಿಕೆಕ್ ಪಾವೊ ಜಾಲ್ಲೊ. ವಿವಿಧ್ ಯೋಜನಾಂಕ್ ಉದಾರ್ ಮನನ್ ದಾನ್ ದಿಲ್ಲ್ಯಾ ಸಮೇಸ್ತಾಂಚೆರ್ ದೆವಾಚಿಂ ಬೆಸಾಂವಾಂ ಮಾಗ್ತಾಂ.

     ಶತಮಾನೋತ್ಸವ್ ವರ್ಸಾಚಾ ಉಗ್ಡಾಸಾಕ್ ಶಿಕಾಪ್ ನಿಧಿ ಆನಿ ಭಲಾಯ್ಕೆ ನಿಧಿ ಪ್ರಾರಂಬ್ ಕೆಲ್ಯಾ. ತಾಂಚಾ ವಾವ್ರಾಚೊ ಫಳ್ ಜಾವ್ನ್ 04.05.2023 ವೆರ್ ಫಿರ್ಗಜ್ಗಾರಾಂನಿ ಶತಮಾನೋತ್ಸವ್ ಆಚರಣ್ ಕೆಲಾ.

    ಮಂಗ್ಳುರ್ ದಿಯೆಸೆಜಿಚ್ಯಾ ವ್ಹಡಿಲಾಂನಿ ಆಮ್ಚಿ ಫಿರ್ಗಜ್ ತಾರಿಕ್ 01-06-2022 ವೆರ್ ವಾರ್‌ಫಿರ್ಗಜ್ ಜಾವ್ನ್ ಆನಿ ಆಮ್ಚೊ ವಿಗಾರ್ ವಿಗಾರ್‌ವಾರ್ ಜಾವ್ನ್ ನೇಮಕ್ ಕೆಲ್ಲೆಂ ಏಕ್ ಚಾರಿತ್ರಿಕ್ ಘಡಿತ್, ಆಮ್ಚ್ಯಾ ಫಿರ್ಗಜೆಚಾ ಇತಿಹಾಸಾಂತ್ ದಾಖಲ್ ಜಾಲೆಂ. ತ್ಯಾ ದಿಸಾ ಥಾವ್ನ್ ದುಖಿ ಸಾಯ್ಬಿಣಿಕ್ ಸಮರ್ಪುನ್ ದಿಲ್ಲಿ ಆಮ್ಚಿ ಫಿರ್ಗಜ್ ವಿಟ್ಲ ವಾರಾಡೊ ಫಿರ್ಗಜ್ ಜಾಲ್ಯಾ ಮ್ಹಣ್ ಸಾಂಗೊಂಕ್ ಸಂತೋಸ್ ಪಾವ್ತಾಂವ್.