ಜೆಜುಚ್ಯಾ ಜಲ್ಮಾಚೊ 2025 ವೊ ಜುಬ್ಲೆವ್ ವರ್ಸಾಚರಣಾಚ್ಯಾ ಸುವಾಳ್ಯಾರ್, ದಿನಾಂಕ್ 10-08-2025 ವೆರ್ ವೆದಿಸೆವಕಾಂಚೊ ಪಾತ್ರೊನ್ ಸಾಂ ಜುವಾಂವ್ ಬರ್ಕ್‌ಮನ್ಸ್  ಹಾಚಾ ಫೆಸ್ತಾ ಸಂಧರ್ಬಿ ಕ್ರೀಸ್ತೀ ಶಿಕ್ಷಣ್ ಆಯೋಗಾಚಾ ಮುಖೆಲ್ಪಣಾರ್ ಪಾತ್ರೊನಾಕ್ ಮಾನ್ ಕರ್ನ್ ವೆದಿಸೆವಕಾಂಚೆ ಫೆಸ್ತ್ ಆಚರಣ್ ಕೆಲೆಂ.

   ಸಕಾಳಿಂ 10:00 ವರಾರ್ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಹ್ಯಾ ಮಿಸಾ ವೆಳಾರ್ ವೆದಿಂ ಸೆವಕಾಂನಿ ದೇವ್ ಸ್ತುತಿ ಚಲವ್ನ್ ವೆಲಿ. ಆನಿ ಸರ್ವ್ ವೆದಿಂ ಸೆವಕಾಂನಿ ಕಾಣಿಕೊ ಅರ್ಪುನ್ ಪವಿತ್ರ್ ಮಿಸಾಚ್ಯಾ ಬಲಿದಾನಾಂತ್ ಭಕ್ತಿನ್ ವಾಂಟೊ ಘೆತ್ಲೊ.

    ಮಿಸಾ ಉಪ್ರಾಂತ್ ಮಟ್ವೆಂ ಸಾಂಸ್ಕೃತಿಕ್ ಕಾರ್ಯೆಂ ಮಾಂಡುನ್ ಹಾಡ್ಲೆಂ. ಪ್ರಾರ್ಥನ್ ಗೀತ್ ಗಾವ್ನ್ ಕಾರ್ಯಾಚಿ ಸುರ್ವಾತ್ ಕೆಲಿ.ಉಪ್ರಾಂತ್  ಭುರ್ಗ್ಯಾಂನಿ ನಾಟ್ಕುಳೊ, ನಾಚ್ಪಾ ಮುಖಾಂತ್ರ್ ಸರ್ವಾಂಚಿ ಮ್ಹನಾ ಕುಶಾಲ್ ಕೆಲಿಂ. ತ್ಯಾ ನಂತರ್ ವೆದಿ ಸೆವಕಾಂಚೊ ಕಾರ್ಯದರ್ಶಿ ವಿಲಿಸ್ಟನ್ ಡಿಸೋಜ ಹಾಣೆಂ ವಾರ್ಷಿಕ್ ವರ್ದಿ ಮಂಡನ್ ಕೆಲಿ.

ಸಚೇತಕ್  ಮಾ|ಬಾ|ಅಮಿತ್ ಪ್ರಕಾಶ್ ರೊಡ್ರಿಗಸ್ ಹಾಣಿಂ ಕ್ವಿಜ್, ಮನೋರಂಜನ್ ಖೆಳ್ ಚಲೊವ್ನ್ ವೆಲೆ. 

     ಸಂಭ್ರಮಾಚಾ ವೆದಿ ಕಾರ್ಯಾಂತ್ ಅಧ್ಯಕ್ಷ್ ಜಾವ್ನ್ ಫಿರ್ಗಜೆಚ್ಯೆ ವಿಗಾರ್ ಬೋ|ಮಾ|ಐವನ್ ಮೈಕಲ್ ರೊಡ್ರಿಗಸ್ ಬಾಪಾಂನಿ ಲ್ಹಾನ್ ಲ್ಹಾನ್ ಕಾಮಾ ಕರ್ನ್, ವೆದಿ ಸೆವಾ ಕರ್ನ್ ಜೆಜುಕ್ ಆಮಿ ಲಾಗಿಂ ಸರ್ತಾಂವ್. ಪಂಗಡ್ ಜಾವ್ನ್ ವಾವ್ರ್ ದೀವ್ನ್ ಫಿರ್ಗಜೆಚ್ಯಾ ಕಾಮಾಂಕ್ ಸಾಂಗಾತ್ ದೀವ್ನ್ ಪಾತ್ರೊನಾಚಾ ಮಜತಿನ್ ಅನಿಕೀ ಬರಿಂ ಕಾಮಾ ಕರ್ನ್ ಬಳ್ವಂತ್ ಜಾಯಾ ಮ್ಹಣ್ ಸಂದೇಶ್ ದಿಲೊ.

    ಫಿರ್ಗಜ್ ಗೊವ್ಳಿಕ್ ಪರಿಷದೆಚೆ ಕಾರ್ಯದರ್ಶಿ ಮಾನೆಸ್ತಿಣ್ ಶ್ವೇತಾ ಪಾಯ್ಸ್  ಹಾಣಿಂ ಹರ್ಯೆಕ್ಲ್ಯಾನಿಂ ಸಾಂಗಾತಾ ಮೆಳೊನ್ ಆಲ್ತಾರಿಚಿ ಸೆವಾ ಕರಿಜೆ. ಬರೊ ಪುಡಾರ್ ಬಾಂದಿಜೆ, ಬರಿಂ ಭುರ್ಗಿ ಜಾವ್ನ್ ಕುಟ್ಮಾಕ್ ನಾಂವ್ ಹಾಡಿಜೆ ತಶೆಂಚ್ ದೆೇವ್ ಆಪೊವ್ಣೆ ವಾಡಜೆ ಮ್ಹಣ್ ಸಾಂಗೊನ್ ಫೆಸ್ತಾಚೆಂ ಶುಭಾಶಯ್ ಪಾಠಯ್ಲೆ. 

  ಕ್ವಿಜ್ ಆನಿ ಮನೋರಂಜನ್ ಖೆಳಾಂತ್ ಜಿಕ್‌ಲ್ಯಾಂಕ್ ಅಧ್ಯಕ್ಷ್ ಬೊ|ಮಾ| ಐವನ್ ಮೈಕಲ್ ರೊಡ್ರಿಗಸ್ ಬಾಪಾನಿಂ ಇನಾಮಾ ವಾಂಟ್ಲಿ.

   ವೆದಿಚೆರ್ ಎಕ್ವೀಸ್ ಆಯೋಗಾಚೊ ಸಂಚಾಲಕ್ ಮಾನೆಸ್ತ್ ರೋಬರ್ಟ್ ಮಸ್ಕರೇನ್ಹಸ್, ಸಾಂ ಪಾವ್ಲ್ ಕೊಂವೆತಾಚಿ ಧರ್ಮ್ ಭಯ್ಣ್ ಸಿ. ಲಿಡಿಯಾ, ಕ್ರೀಸ್ತೀ ಶಿಕ್ಷಣ್ ಆಯೊಗಾಚಿ ಸಂಚಾಲಕಿ ಶ್ರೀಮತಿ ಹೆಲೆನ್ ಪುಡ್ತಾದೊ ಹಾಜರ್ ಆಸ್‌ಲ್ಲಿ. 

        ಭುರ್ಗ್ಯಾಂಚಿ ವ್ಹಡಿಲಾಂ, ದಾನಿ ತಶೆಂಚ್ ಫಿರ್ಗಜ್‌ಗಾರಾಂ ಹ್ಯಾ ಸಂಭ್ರಮಾಂತ್  ಹಾಜರ್ ಆಸ್‌ಲ್ಲಿಂ

    ವೆದಿ ಸೆವಾಕಾಂಚೊ ಅಧ್ಯಕ್ಷ್ ಕ್ರಿಸ್ಟನ್ ರೊಡ್ರಿಗಸಾನ್ ಸ್ವಾಗತ್ ಕೆಲೊ. ಜೇಸನ್ ಲುವಿಸ್ ಹಾಣೆಂ  ಸಹಕಾರ್ ದಿಲ್ಲ್ಯಾ ಸರ್ವಾಂಕ್ ಧನ್ಯವಾದ್ ಪಾಠಯ್ಲೆಂ.

ಸಚೇತಕ್ ಆ್ಯಸ್ಟೆಲ್ ರೊಡ್ರಿಗಸಾನ್ ಕಾರ್ಯೆಂ ಚಲವ್ನ್ ವೆಲೆಂ.

  ಫೆಸ್ತಾಚೊ ಸಂಭ್ರಮ್ ದೊಡ್ತೊ ಕರ್ಚ್ಯಾಕ್ ಅಸಾ ಕೆಲ್ಯಾ ಜೆವ್ಣಾಂತ್ ಸಮೇಸ್ತಾಂನಿ ವಾಂಟೊ ಘೆತ್ಲೊ 

   ಅಶೆಂ ದಾನಿಂಚಾ ಆನಿ ಸರ್ವಾಂಚ್ಯಾ ಸಹಕಾರಾನ್ ಫೆಸ್ತ್ ಭೋವ್ ಅರ್ಥಾಭರಿತ್ ರೀತಿನ್  ಸಂಭ್ರಮ್ಲೆಂ

Photo Gallery's:  👉🏻 https://drive.google.com/drive/folders/167NPcxxrJrJIsraiuqA_-I36VS2HZtLU?usp=sharing