ಸಕಾಳಿಂ 9:30 ವರಾರ್ ಪವಿತ್ರ್ ಮಿಸಾಚ್ಯಾ ಬಲಿದಾನಾಂತ್ ಪ್ರಧಾನ್ ಯಾಜಕ್ ಜಾವ್ನ್ ಮಂಗ್ಳುರ್ ದಿಯೆಸಿಜಿಚ್ಯಾ ಸುವಾರ್ತಾ ಪರ್ಗಟ್ಣಿ ಆಯೋಗಾಚೆ ಕಾರ್ಯದರ್ಶಿ ಮಾ|ಬಾ| ಹ್ಯಾರಿ ಡಿಸೋಜ, ಫಿರ್ಗಜ್ ವಿಗಾರ್  ಬೊ|ಮಾ|ಬಾ   ಐವನ್ ಮೈಕಲ್ ರೊಡ್ರಿಗಸ್ ಹಾಣಿಂ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಹ್ಯಾ ಮಿಸಾ ವೇಳಾರ್ ಕ್ರೀಸ್ತಿ ಶಿಕ್ಷಣ್ ಜೋಡ್ಚ್ಯಾ ಭುರ್ಗ್ಯಾಂನಿ, ಶಿಕ್ಷಾಕಾನಿಂ, ವ್ಹಡಿಲಾನಿಂ, ಆನಿ ದೇವ್ ಸ್ತುತಿ ಆಯೋಗ್ ಪಂಗ್ಡಾಚ್ಯಾ ಸಾಂದ್ಯಾನಿಂ ಸಾಂಗಾತಾ ಮೆಳೊನ್ ದೇವ್ ಸ್ತುತಿ ಚಲವ್ನ್ ವೆಲಿ. ಸರ್ವ್ ಭುರ್ಗ್ಯಾಂನಿ ಉಪ್ಕಾರಿ ಮ್ಹನಾನ್ ಕಾಣಿಕೊ ಭೆಟವ್ನ್ ಪವಿತ್ರ್ ಮಿಸಾಚ್ಯಾ ಬಲಿದಾನಾಂತ್ ಭಕ್ತಿನ್ ವಾಂಟೊ ಘೆತ್ಲೊ. 

    ಮಿಸಾ ಉಪ್ರಾಂತ್ ಬಗ್ಲೆಚ್ಯಾ ಸಾಲಾಂತ್ ಸಾಂಸ್ಕೃತಿಕ್ ಕಾರ್ಯೆಂ ಮಾಂಡುನ್ ಹಾಡ್ಲೆಂ.  ವಿವಿಂಗಡ್ ವರ್ಗಾ ಥಾವ್ನ್ ಭುರ್ಗ್ಯಾಂನಿ ತಾಂಚಿ ತಾಲೆಂತಾ ಪ್ರದರ್ಶನ್ ಕೆಲಿಂ. 

    ವೆದಿ ಕಾರ್ಯಾಂತ್ ಮುಕೆಲ್ ಸಯ್ರೆ ಜಾವ್ನ್ ಮಾ|ಬಾ| ಹ್ಯಾರಿ ಡಿಸೋಜ, ಬೊ| ಮಾ|ಬಾ ಐವನ್ ಮೈಕಲ್ ರೊಡ್ರಿಗಸ್, ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಮಾನೆಸ್ತ್ ವಿಜಯ್ ಪಾಯ್ಸ್, ಕಾರ್ಯದರ್ಶಿ ಮಾನೆಸ್ತಿಣ್ ಶ್ವೇತಾ ಪಾಯ್ಸ್, ಆಯೋಗ್ ಸಂಯೋಜಕ್ ಮಾನೆಸ್ತ್ ರೋಬರ್ಟ್  ಮಸ್ಕರೇನಸ್, ಕ್ರೀಸ್ತಿ ಶಿಕ್ಷಣ್ ಸಂಚಾಲಕಿ ಮಾನೆಸ್ತಿಣ್ ಹೆಲೆನ್ ಫುಡ್ತಾದೊ, ದೇವ್ ಸ್ತುತಿ ಆಯೋಗ್ ಸಂಚಾಲಕಿ ಮಾನೆಸ್ತಿಣ್ ಶಾಲೆಟ್ ಪಾಯ್ಸ್, ಸಾಂ.ಪಾವ್ಲ್ ಕೊವೆಂತಾಚಿ ಸುಪೀರಿಯರ್ ಸಿ| ರೆಮೆಡಿಯಾ ಗೊಮ್ಸ್, ಭುರ್ಗಿಂ, ಪೋಷಕಾಂ, ಆನಿ ಫಿರ್ಗಜ್‌ಗಾರಾಂ ಹಾಜರ್ ಆಸ್‌ಲ್ಲಿಂ. ಹಾಂಕಾ ಸರ್ವಾಂಕ್ ಆ್ಯಲನ್ ಮಸ್ಕರೇನಸಾನ್ ಸ್ವಾಗತ್ ಕೆಲೊ. 

  ಮಾನೆಸ್ತಿಣ್ ಹೆಲೆನ್ ಫುಡ್ತಾದೊನ್ ವಾರ್ಷಿಕ್ ವರ್ದಿ ಮಂಡನ್ ಕೆಲಿ. ಬಾ| ಹ್ಯಾರಿ ಡಿಸೋಜ ಹಾಣಿಂ ಭುರ್ಗ್ಯಾಂನಿ ಬೊರೊ ರೂಕ್ ಜಾವ್ನ್ ಬರೆಂ ಫಳ್ ದೀಂವ್ಕ್ ಕ್ರೀಸ್ತಿ ಶಿಕ್ಷಣ್ ಪ್ರೆರಣ್ ಮ್ಹಳ್ಳೊ ಸಂದೇಶ್ ದಿಲೊ ಆನಿ ಸುವಾರ್ತಾ ಪರ್ಗಟ್ಣಿ ಆನಿ ಮಿಶನರಿ ಭುರ್ಗ್ಯಾಂಚ್ಯಾ ಮೆಳಾ ವಿಶ್ಯಾಂತ್ ಫಿರ್ಗಜ್‌ಗಾರಾಂಕ್ ಮಾಹೆತ್ ದಿಲಿ. ವಿಗಾರ್ ಬಾಪಾನಿಂ ಕ್ರೀಸ್ತಿ ಶಿಕ್ಷಣ್ ಶಿಕೊಂವ್ಚಾ ಸರ್ವ್ ಶಿಕ್ಷಾಕಾಂಚ್ಯಾ ತ್ಯಾಗ್ ಸಾಕ್ರಿಫಿಸಾಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕರ್ನ್, ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ಮನಪೂರ್ವಕಿ ಉಪ್ಕಾರ್ ಬಾವುಡ್ಲೊ. ಪೊಷಕಾಂ ತರ್ಫೆನ್ ಮಾನೆಸ್ತ್ ಮನೋಹರ್ ಲ್ಯಾನ್ಸಿ ಡಿಸೋಜಾನ್ ಕ್ರೀಸ್ತಿ ಶಿಕ್ಷಣಾ ವಿಶ್ಯಾಂತ್ ಆಪ್ಲಿಂ ಬೊಗ್ಣಾಂ ಉಚಾರ್ಲಿ. ಪರೀಕ್ಷೆಂತ್, ವಾವ್ರಾ ಬೂಕಾಂತ್ ಆನಿ ಚಟುವಟಿಕೆಂತ್ ವಿಜೇತ್ ಜಾಲ್ಲ್ಯಾಂಕ್ ಇನಾಮಾಂ ವಾಂಟುನ್ ಅಭಿನಂದನ್ ಪಾಠಯ್ಲೆಂ. 

      ಶೋನ್ ಮಸ್ಕರೇನಸ್ ಆನಿ ಶೈನಿ ವೇಗಸ್ ಹಾಣಿಂ ಕಾರ್ಯೆಂ ಚಲವ್ನ್ ವೆಲೆಂ. ನಿಕಿತ್ ವೇಗಸಾನ್ ಸಹಕಾರ್ ದಿಲ್ಲ್ಯಾ ಸರ್ವಾಂಕ್ ಧನ್ಯವಾದ್ ಪಾಠಯ್ಲೆಂ. ಗೊವ್ಳಿಕ್ ಪರಿಷದೆಚ್ಯಾ ಮುಖೆಲ್ಪಣಾರ್ ಜೆವ್ಣಾಚಿ ಮಾಂಡಾವಳ್ ಆಸಾ ಕೆಲ್ಲಿ. ಅಶೆಂ ಸರ್ವ್ ಫಿರ್ಗಜ್‌ಗಾರಾಂಚ್ಯಾ ಸಹಕಾರಾನ್ ಕ್ರೀಸ್ತಿ ಶಿಕ್ಷಣ್ ದಿವಸ್ ಭೋವ್ ಅರ್ಥಾಭರಿತ್ ರೀತಿನ್ ಆಚರಣ್ ಕೆಲೊ

Photo Gallery:  👉🏻https://photos.app.goo.gl/o266LuSgJkVigwNr5