‎     ನಿಮಾಣ್ಯಾ ಬ್ರೇಸ್ತಾರಾಚಿ ಸೆರೆಮನಿ ಸಾಂಜೆರ್ 6:00 ವರಾರ್ ಪ್ರಾರಂಭ್ ಕೆಲಿ. ಪ್ರಧಾನ್ ಯಾಜಾಕ್ ಬೊ|ಮಾ|ಬಾ|ಐವನ್ ಮೈಕಲ್ ರೊಡ್ರಿಗಸ್ ಹಾಣಿಂ ಫುಡ್ಲ್ಯಾ ದಿಸಾನಿಂ ಆಮ್ಚ್ಯಾ ಕುಟ್ಮಾನಿಂ "ದೇವ್ ಆಪವ್ಣಿಂ ಜಾಯ್ಜಯ್ ತರ್ ಆಮ್ಚ್ಯಾ  ಕುಟ್ಮಾಂನಿ ಯಾಜಾಕಾಂ  ವಿಶ್ಯಾಂತ್ ಬರೆಂ ಉಲಂವ್ಕ್ ಜಾಯ್" ಮ್ಹಳ್ಳೊ ಸಂದೇಶ್ ದಿಲೊ.  

ಉಪ್ರಾಂತ್ ವಿವಿಧ್ ವರ್ಗಾ ಥಾವ್ನ್ ವಿಂಚ್ಲೆಲ್ಯಾ ಬಾರಾ ಜಣಾಂಚೆ ಪಾಯ್ ದುಂವ್ಚ್ಯಾ ಮುಖಾಂತ್ರ್ ಮೊಗಾ ಸೆವೆಕ್ ಖರೊ ಅರ್ಥ್ ದಿಲೊ.  ಉಪ್ರಾಂತ್ ಎವ್ಕರಿಸ್ತಾಚ್ಯಾ ಲಾಯಿಕ್ ಮ್ಹಣಿಯಾರಾನಿಂ ವೆದಿ ಮುಖಾರ್ ರಾವೊನ್ ತಾಂಚ್ಯೊ ಭಾಸವ್ಣ್ಯೊ ನವ್ಯಾನ್ ಕೆಲ್ಯೊ. 

ಫಿರ್ಗಜ್ ಗೊವ್ಳಿಕ್ ಪರಿಷದೆಚ್ಯಾ ಸಾಂದ್ಯಾನಿ ದೇವ್ ಸ್ತುತೆಚೆಂ ಮುಖೆಲ್ಪಣ್ ಘೆತ್ಲೆಂ. ಜೆಜು ಗೆತ್ಸೆಮನಿ ಮಳ್ಯಾಕ್ ಗೆಲ್ಲೊ ಸಂಕೇತ್ ಜಾವ್ನ್ ಕ್ರೀಸ್ತ್ ಪ್ರಸಾದ್ ವಿಶೆವಾಚ್ಯಾ ಅಲ್ತಾರಿರ್ ವರ್ನ್ ದವರ್ಲೊ. ಉಪ್ರಾಂತ್ ಸರ್ವ್ ಫಿರ್ಗಜ್‌ಗಾರಾಂನಿ ವಿಗಾರ್ ಬಾಪಾ ಸವೆಂ ಎವ್ಕರಿಸ್ತಾಚ್ಯಾ ಆರಾಧಾನಾಂತ್ ಭಾಗ್ ಘೆತ್ಲೊ.

‎       ದಿನಾಂಕ್ 18-04-2025 ವೆರ್ ನಿಮಾಣ್ಯಾ ಸುಕ್ರಾರಾ ಸಕಾಳಿಂ 9:00 ಥಾವ್ನ್ 10:00 ವರಾಂ ಪರ್ಯಾಂತ್ ವಿಗಾರ್ ಬಾಪಾನಿಂ ಖುರ್ಸಾವಾಟ್ ಚಲವ್ನ್ ವೆಲಿ. ಉಪ್ರಾಂತ್ ಸಾಂಜೆರ್ 4:00 ವರಾರ್ ಸೆರೆಮನಿ ಆರಂಭ್ ಕೆಲಿ. ಸೆರೆಮನಿಚೆ ಪ್ರಧಾನ್ ಯಾಜಾಕ್ ಜಾವ್ನ್ ಮಾ|ಬಾ|ಅರುಣ್ ಲೋಬೊ ಹಾಣಿಂ "ಹರ್ಯೆಕ್ಲ್ಯಾಚ್ಯಾ ಜಿವಿತಾಂತ್ ಕಷ್ಟ್ ಆಸಾತ್, ಪೂಣ್ ಆಮಿ ಹೆರಾಂಚಾ ಕಷ್ಟಾಂಕ್ ಆಧಾರ್ ದೀಂವ್ಕ್ ಜಾಯ್" ಮ್ಹಳ್ಳೊ ಸಂದೇಶ್ ದಿಲೊ. ಉಪ್ರಾಂತ್ ವಿವಿಧ್ ಗರ್ಜಾಂ ಖಾತಿರ್ ಸಂಭ್ರಮಿಕ್ ಪ್ರಾರ್ಥನಾ ಚಲವ್ನ್ ವೆಲಿ. 

  ತ್ಯಾ ನಂತರ್ ಖುರ್ಸಾಚೆಂ ಆರಾಧಾನ್ ಕರ್ನ್ ಸರ್ವ್ ಫಿರ್ಗಜ್‌ಗಾರಾಂನಿ ಹ್ಯಾ ಖುರ್ಸಾಕ್ ಭಕ್ತಿನ್  ಮಾನ್ ಕರ್ನ್ ಉಮೊ ಘೆತ್ಲೊ. ಉಪ್ರಾಂತ್ ಆಮಿಂ ಸರ್ವಾಂನಿ ಜೆಜು ಕ್ರೀಸ್ತಾಚ್ಯಾ ದೈವಿಕ್ ಉತ್ರಾನ್ ಆನಿ ಕುಡಿ ರಗ್ತಾನ್ ಪೋಷಿತ್ ಜಾಂವ್ಚ್ಯಾಕ್ ಕ್ರೀಸ್ತ್ ಪ್ರಸಾದಾಚೆ ರಿತಿಂತ್ ಭಕ್ತಿನ್ ವಾಂಟೊ ಘೆತ್ಲೊ.

 ದಿನಾಂಕ್ 19-04-2025 ವೆರ್ ಆಲ್ಲೆಲೂಯಾಚ್ಯಾ ಸನ್ವಾರಾಚಿ ಸೆರೆಮನಿ ಸಾಂಜೆರ್ 7:00 ವರಾಂಚೆರ್ ಪ್ರಾರಂಭ್ ಕೆಲಿ. ಸುರ್ವೆರ್ ಉಜ್ವಾಡಾಚಿ ರೀತ್- ಉಜ್ಯಾಚೆರ್ ಆಶೀರ್ವಾದ್ ಆನಿ ಪಾಸ್ಕಾಂಚ್ಯಾ ವಾತಿಚಿ ತಯಾರಾಯೆಚಿ ರೀತ್ ಮುಖ್ಲ್ಯಾ ಪೊರ್ಟಿಕೊಂತ್ ಚಲವ್ನ್ ವೆಲಿ. 

 ಉಪ್ರಾಂತ್ ದೆವಾಚ್ಯಾ ಉತ್ರಾಚೊ ಸಂಭ್ರಮ್ ಜಾವ್ನ್ ಪರ್ನ್ಯಾ ಸೊಲ್ಲ್ಯಾಂತ್ಲಿ ತೀನ್ ಆನಿ ನವ್ಯಾ ಸೊಲ್ಲ್ಯಾಂತ್ಲಿ ದೋನ್ ವಸ್ಪಾಂ ಆನಿ ಹರ್ಯೆಕಾ ವಾಚ್ಪಾ ಉಪ್ರಾಂತ್ ಅಂತರ್ ಗೀತ್ ಪರ್ಗಟ್ ಕೆಲೆಂ.

  ಹ್ಯಾ ಸೆರೆಮನಿಚೆ ಪ್ರಧಾನ್ ಯಾಜಾಕ್ ಜಾವ್ನ್ ಬೊ|ಮಾ|ಬಾ ಐವನ್ ಮೈಕಲ್ ರೊಡ್ರಿಗಸ್ ಹಾಣಿಂ "ಆಮಿ ಆಮ್ಚ್ಯಾ ಬರ್ಯ್ಯಾ ಜಿಣಿಯೆ ಮುಕಾಂತ್ರ್ ಜಿವಂತ್ ಜೆಜು ಕ್ರೀಸಾಕ್ ಸಾಕ್ಸ್ ಜಾಂವ್ಕ್ ಜಾಯ್" ಮ್ಹಳ್ಳೊ ಸಂದೇಶ್ ದಿಲೊ.  ಉಪ್ರಾಂತ್ ಉದಾಕ್ ಆಶೀರ್ವಾದಿತ್ ಕರ್ನ್ ಆಮ್ಚ್ಯಾ ಪವಿತ್ರ್ ಸ್ನಾನಾಚೊ ಭಾಸವ್ಣೊ ನವ್ಯಾನ್ ಕೆಲ್ಯೊ. ಫಿರ್ಗಜ್ ಕುಟ್ಮಾಚ್ಯಾ ಸಾಂದ್ಯಾನಿ ಭುರ್ಗ್ಯಾಂನಿ, ಧಾರ್ಮಿಕಾಂನಿ, ಯುವಜಣಾಂನಿ ಆನಿ ಮಾಲ್ಗಡ್ಯಾಂನಿ ಸಾಂಗಾತಾ ಮೆಳೊನ್ ದೇವ್ ಸ್ತುತೆಚೆಂ ಮುಖೆಲ್ಪಣ್ ಘೆತ್ಲೆಂ. ಆನಿ ದೆವಾನ್ ಕೆಲ್ಲ್ಯಾ ಸರ್ವ್ ಬರೆಪಣಾಕ್ ಉಪ್ಕಾರಿ ಮ್ಹನಾನ್ ಕಾಣಿಕೊ ಭೆಟವ್ನ್  ಭಕ್ತಿನ್ ವಾಂಟೊ ಘೆತ್ಲೊ. 

 ಅಕ್ರೇಕ್ ಸಾಕ್ರಾಮೆಂತಾಚಾ ಆರಾಧಾನಾಚೆಂ ಮೊನ್‌ಸ್ಟ್ರೆಂನ್ಸ್ (Monstrance) ದಾನ್ ಜಾವ್ನ್ ದಿಲ್ಲ್ಯಾ ತಶೆಂಚ್ ತ್ಯಾ ದಿಸಾಕ್ ಫಳ್ಹಾಹಾರ್ ದಾನ್ ದಿಲ್ಲ್ಯಾ ಮಾನೆಸ್ತಿಣ್  ಶಾಲೆಟ್ ಫಿಲೋಮಿನಾ ಕ್ರಾಸ್ತಾಚ್ಯಾ ನಾಂವಾನ್ ತಿಚಿ ಆವಯ್ ಮಾನೆಸ್ತಿಣ್ ಎಲಿಜಾ ಕ್ರಾಸ್ತಾ ಹಿಕಾ ಮಾನ್ ಕೆಲೊ.  

ತಶೆಂಚ್ ಫೆಸ್ತಾ ಬಾಬ್ತಿನ್ ಮುಡ್ದೊಮ್ ದಿಲ್ಲ್ಯಾ ಸರ್ವಾಂಕ್ ವಾತ್ ದೀವ್ನ್ ಮಾನ್ ಕೆಲೊ.  

ಉಪ್ರಾಂತ್ ವಿಗಾರ್ ಬಾಪಾನಿಂ ಫೆಸ್ತಾಕ್ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ಮನಪೂರ್ವಕಿ ಉಪ್ಕಾರ್ ಬಾವುಡ್ಲೊ. 

ಸರ್ವಾಂನಿ ಎಕಾಮೆಕಾ ಫೆಸ್ತಾಚ್ಯೆ ಶುಭಾಶಯ್ ಪಾಠವ್ನ್  ಫಳ್ಹಾಹಾರ್ ಸೆವ್ನ್ ಫೆಸ್ತಾಚೊ ಸಂಭ್ರಮ್ ದೊಡ್ತೊ ಕೆಲೊ.

Photo Gallery's:  👉🏻 https://drive.google.com/drive/folders/1ZxOvBpmkfrzJ_-J9yBUwmxE-TT7qrH6u?usp=sharing

👉🏻https://photos.app.goo.gl/PQhsK1ZN2aUPJCcR7

👉🏻https://drive.google.com/drive/folders/1aSJzYs8AjIOrj8D1FdAT2aQgy2_4RWB5?usp=sharing

👉🏻 https://drive.google.com/drive/folders/1DCJktzDvRpvv7fcP8BSnVS53wf37CtZd?usp=sharing