ದಿನಾಂಕ್ 06-07-2025 ವೆರ್ ಸಕಾಳಿಂ 7:00 ವರಾಂಚೆರ್ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಹ್ಯಾ ಮಿಸಾ ವೆಳಾರ್ ನಿತ್ಯಾಧರ್ ವಾಡ್ಯಾಗಾರಾಂನಿ ದೇವ್ ಸ್ತುತಿ ಚಲವ್ನ್ ವೆಲಿ. ಆನಿ ಸರ್ವ್ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ಕಾಣಿಕೊ ಭೆಟವ್ನ್ ಪವಿತ್ರ್ ಮಿಸಾಚ್ಯಾ ಬಲಿದಾನಾಂತ್ ಭಕ್ತಿನ್ ವಾಂಟೊ ಘೆತ್ಲೊ.

 ದೊನ್ಪಾರಾಂ 12:00 ವರಾರ್ ಮಾನೆಸ್ತ್ ಎಡ್ವರ್ಡ್ ರೇಗೊಚ್ಯಾ ಘರಾ ಸಾಂಗಾತಾ ಮೆಳೊನ್ ಫೆಸ್ತಾಚೊ ಸಂಭ್ರಮ್ ಆಚರಣ್ ಕೆಲೊ. ಪಯ್ಲೆಂ ಮಾಗ್ಣ್ಯಾ ವಿಧಿಂ ಸವೆಂ ಪವಿತ್ರ್ ಪುಸ್ತಕಾಕ್ ಫುಲಾಂ ಅರ್ಪುನ್ ಮಾನ್ ಕೆಲೊ. ಉಪ್ರಾಂತ್ ವಾಡ್ಯಾಂತ್ಲ್ಯಾ ಭುರ್ಗ್ಯಾಂನಿ ನಾಚ್ಪಾ ಮುಖಾಂತ್ರ್ ಸರ್ವಾಂಚಿ ಮ್ಹನಾ ಕುಶಾಲ್ ಕೆಲಿಂ. ತ್ಯಾ ನಂತರ್ ವಾಡ್ಯಾಗಾರಾಂಕ್, ಗುರ್ಕಾರಾಂಕ್ ಅನಿಂ ಧಾರ್ಮಿಕಾಂಕ್ ಮನೋರಂಜನ್ ಖೆಳ್ ಚಲೊವ್ನ್ ವೆಲೆ. 

  ಫೆಸ್ತಾಚ್ಯಾ ವೆದಿ ಕಾರ್ಯಾಂತ್ ಅಧ್ಯಕ್ಷ್ ಜಾವ್ನ್ ಫಿರ್ಗಜೆಚ್ಯೆ ವಿಗಾರ್ ಬೋ|ಮಾ|ಬಾ| ಐವನ್ ಮೈಕಲ್ ರೊಡ್ರಿಗಸ್ ವಾಡ್ಯಾಗಾರಾಂಚ್ಯಾ ಮಿನತೆಕ್ ಶಾಬಾಸ್ಕಿ ಪಾಟವ್ನ್, ಸಾಂಗಾತಾ ಕಾಮ್ ಕೆಲ್ಲೆ ವರ್ವಿಂ ವಾಡೊ ಬಳ್ವಂತ್ ಜಾತಾ ಮ್ಹಣ್ ಸಂದೇಶ್ ದಿಲೊ.

 ಬಾ| ಅಮಿತ್ ರೊಡ್ರಿಗಸಾನ್ ಹರ್ಯೆಕ್ಲ್ಯಾನಿಂ ಸಾಂಗಾತಾ ಮೆಳೊನ್ ವಾಡೊ ಬಾಂದುನ್ ಹಾಡಿಜಯ್ ಮ್ಹಣ್ ಸಾಂಗೊನ್ ಫೆಸ್ತಾಚೆ ಶುಭಾಶಯ್ ಪಾಠಯ್ಲೆ. 

   ಕಾರ್ಯದರ್ಶಿ ಶ್ವೇತಾ ಪಾಯ್ಸಾನ್ ಫೆಸ್ತಾಚೆ ಶುಭಾಶಯ್ ಪಾಠಯ್ಲೆಂ. ಆನಿ ವಾಡ್ಯಾಗಾರಾಂನಿ ಫಿರ್ಗಜೆ ಥಂಯ್ ದಾಕೊಂವ್ಚಾ ಸಹಾಕಾರಾಕ್, ಉದಾರ್ ಮ್ಹನಾಕ್ ಶಾಬಾಸ್ಕಿ ಪಾಟಾಯ್ಲಿ.

   ಮಾನೆಸ್ತ್ ಫ್ರಾನ್ಸಿಸ್ ಮಸ್ಕರೇನಸಾನ್ ಮರಿಯೆಚ್ಯಾ ಜಿಣ್ಯೆ ವಿಶ್ಯಾಂತ್ ವಿವರುನ್ ನಿತ್ಯಾಧರ್ ಮಾಯೆಚಿ ದೇಖ್ ಘೆವ್ನ್  ಎಕಾಮೆಕಾಚ್ಯಾ ಗರ್ಜಾಂಕ್ ಕುಮೊಕ್ ಕೆಲ್ಯಾರ್ ಆಮ್ಕಾಂ ಸರ್ಗಾರ್ ಖಂಡಿತ್ ಜಾವ್ನ್ ದಿರ್ವಿಂ ಆಸ್ತೆಲಿಂ ಮ್ಹಳ್ಳೊ ಸಂದೇಶ್ ದಿಲೊ.

ಎಕ್ವೀಸ್ ಆಯೋಗಾಚೊ ಸಂಚಾಲಕ್ ಮಾನೆಸ್ತ್ ರೋಬರ್ಟ್ ಮಸ್ಕರೇನ್ಹಸ್,ಸಾಂ ಪಾವ್ಲ್ ಕೊಂವೆತಾಚಿ ಸುಪೀರಿಯರ್ ಸಿ| ಜಾನೆಟ್, ಸಾಂ ಪಾವ್ಲ್ ಕೊವೆಂತಾಚಿ ಧರ್ಮ್ ಭಯ್ಣಿಂ, ಗೊವ್ಳಿಕ್ ಪರಿಷದೆಚೆ ಅದ್ಲೊ ಉಪಾಧ್ಯಕ್ಷ್, ಮಾನೆಸ್ತ್ ಮನೋಹರ್ ಲ್ಯಾನ್ಸಿ ಡಿಸೋಜ , ದೇವ್ ಸ್ತುತಿ ಆಯೋಗ್ ಸಂಚಾಲಕಿ ಶಾಲೆಟ್ ಪಾಯ್ಸ್, 9 ವಾಡ್ಯಾಚೆ ಗುರ್ಕಾರ್ ಆನಿ ಸರ್ವ್ ನಿತ್ಯಾಧಾರ್ ವಾಡ್ಯಾಗಾರಾಂ ಹಾಜರ್ ಆಸ್‌ಲ್ಲಿಂ.

   ವಾಡ್ಯಾಚಿ ಕಾರ್ಯದರ್ಶಿ ಪ್ರೀಮ ಪಿಂಟೊ ಹಿಣೆಂ  ವಾರ್ಷಿಕ್ ವರ್ದಿ ಮಂಡನ್ ಕೆಲಿ.

   ಉಪ್ರಾಂತ್ ವಾಡ್ಯಾಂತ್ಲ್ಯಾ ಪ್ರಾಯ್ವಂತಾಕ್, ವಿಶೇಷ್ ಸಾಧನ್ ಕೆಲ್ಲ್ಯಾಂಕ್, ಪಾಟ್ಲ್ಯಾ ಸಬಾರ್ ವರ್ಸಾಂ ಥಾವ್ನ್  ಸೆವಾ ದಿಲ್ಲ್ಯಾಗುರ್ಕಾರಾಂಕ್ , ಪ್ರತಿನಿಧಿಂಕ್ ,‌ ತಾಲೆಂತ್ವಂತ್ ಭುರ್ಗ್ಯಾಂಕ್ ತಶೆಂಚ್ ವಿಗಾರ್ ಬಾಪಾಂಕ್ ಆನಿ ಬಾ| ಅಮಿತ್ ಹಾಂಕಾ ಸರ್ವಾಂಕ್ ವಾಡ್ಯಾಗಾರಾಂ ತರ್ಫೆನ್ ಮಾನ್ ಕೆಲೊ. 

   ಸರ್ವ್ ಮಾನಾಚ್ಯಾ ಸಯ್ರ್ಯಾಂಕ್ ಗುರ್ಕಾರ್ ವಲೇರಿಯನ್ ವೇಗಸ್ ಹಾಣೆಂ ಸ್ವಾಗತ್ ಕೆಲೊ. ಮಾನೆಸ್ತಿಣ್ ಶಾಂತಿ ಮಸ್ಕರೇನ್ಹಸ್ ಹಿಣೆಂ ಸಹಕಾರ್ ದಿಲ್ಲ್ಯಾ ಸರ್ವಾಂಕ್ ಧನ್ಯವಾದ್ ಪಾಠಯ್ಲೆಂ.

ಮಾನೆಸ್ತ್ ಅನಿಲ್ ರೇಗೊ ಹಾಣಿಂ ಕಾರ್ಯೆಂ ಚಲವ್ನ್ ವೆಲೆಂ.

  ಫೆಸ್ತಾಚೊ ಸಂಭ್ರಮ್ ದೊಡ್ತೊ ಕರ್ಚ್ಯಾಕ್ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ಜೆವಾಣ್ ತಯಾರ್ ಕೆಲ್ಲೆಂ.

 ಅಶೆಂ ಸರ್ವಾಂಚ್ಯಾ ಸಹಕಾರಾನ್  ವಾಡ್ಯಾ ಫೆಸ್ತ್ ಭೋವ್ ಅರ್ಥಾಭರಿತ್ ರೀತಿನ್  ಸಂಭ್ರಮ್ಲೆಂ.

Photo Gallery's:  👉🏻 https://photos.app.goo.gl/UCYDGjGZ9CtaSpPYA