ಎಕ್ ಶಿಕ್ಷಕ್ ಭುರ್ಗ್ಯಾಂಚಿ ಪರಿಸ್ಥಿತಿ ಸಮ್ಜಂಕ್ ಸಕ್ತಾ. ಆಮ್ಚಾ ಶಿಕ್ಷಣಾ ವರ್ವಿಂ ಭುರ್ಗ್ಯಾಂ ಥಂಯ್ ಬದ್ಲಾವಣ್ ಜಾತಾ. ಆಮಿ ಸದಾಂಚ್ ಆಮ್ಚ್ಯಾ ವೃತ್ತೆಚೊ, ಭುರ್ಗ್ಯಾಂಚೊ ಆನಿ ಶಿಕೊಂವ್ಚ್ಯಾ ವಿಷಯಾಚೊ ಮೋಗ್ ಕೆಲೊ ತರ್ ಖಂಡಿತ್ ಜಾವ್ನ್ ಏಕ್ ಪರಿಪೂರ್ಣ್ ಶಿಕ್ಷಕ್ ಜಾವ್ಯೆತ್ ಮ್ಹಣ್ ಕಥೊಲಿಕ್ ಸಭಾ ವಿಟ್ಲ ಘಟಕಾಚ್ಯಾ ಮುಖೆಲ್ಪಣಾರ್ ಆಚರಣ್ ಕೆಲ್ಲ್ಯಾ "ಶಿಕ್ಷಕಾಂಚೊ ದಿವಸ್" ಕಾರ್ಯಕ್ರಮಾಂತ್ ಮುಖೆಲ್ ಸಯ್ರೊ ಮಾ|ಬಾ| ಅಶೊಕ್ ರಾಯನ್ ಕ್ರಾಸ್ತಾನ್ ಶಿಕ್ಷಕಾಂಕ್ ಸಂದೇಶ್ ದಿಲೊ.

      ಕಾರ್ಯಕ್ರಮಾಚೊ ಅಧ್ಯಕ್ಷ್ ಘಟಕಾಚೊ ಆತ್ಮಿಕ್ ನಿರ್ದೇಶಕ್ ಬೊ|ಮಾ| ಐವನ್ ಮೈಕಲ್ ರೊಡ್ರಿಗಸ್ ಬಾಪಾನಿಂ ಆಮಿ ಕ್ರಿಸ್ತೀ ಶಿಕ್ಷಕಾಂ ಜಾವ್ನಾಸಾಂವ್. ಕೇವಲ್ ಲೌಕಿಕ್ ಶಿಕ್ಷಣ್ ನ್ಹಯ್ ಆಸ್ತಾಂ ಅತ್ಮಿಕ್ ಶಿಕ್ಷಣ್ ದಿಂವ್ಚಿ ಜವಾಬ್ದಾರಿ ಆಸಾ ಮ್ಹಣ್ ಉಲೊ ದಿಲೊ.

     ಕಥೊಲಿಕ್ ಸಭಾ ವಿಟ್ಲ ಘಟಕಾಚ್ಯಾ ಮುಖೆಲ್ಪಣಾರ್, ದಿನಾಂಕ್ 7-09-2025 ವೆರ್ ಆಯ್ತಾರಾ ಪಯ್ಲ್ಯಾ ಮಿಸಾ ಉಪ್ರಾಂತ್ ಸಮುದಾಯ್ ಭವನಾಚಾ ಮಿನಿ ಸಭಾಸಲಾಂತ್ ಫಿರ್ಗಜೆಂತ್ಲ್ಯಾ ಸರ್ವ್ ಶಿಕ್ಷಕಾಂಕ್ ಸಾಂಗಾತಾ ಘೆವ್ನ್ ಹೆಂ ಕಾರ್ಯೆಂ ಮಾಂಡುನ್ ಹಾಡ್ಲೆಂ.

     ಮಾ|ಬಾ| ಅಮಿತ್ ಪ್ರಕಾಶ್ ರೊಡ್ರಿಗಸ್ ಬಾಪ್ ಏಕ್ ಶಿಕ್ಷಕ್ ಜಾವ್ನ್ ಅಪ್ಲ್ಯಾ ಸೆವೆಚೊ ಸ್ವ ಅನುಭವ್ ವಾಂಟುನ್ ಘೆತ್ಲೊ.

     ಕಾರ್ಯಕ್ರಮಾಂತ್  ಮಾನೆಸ್ತ್ ದೊ| ಅನಿಲ್ ರೇಗೊಕ್ ಸನ್ಮಾನ್ ಕೆಲೊ. ಅಯ್ಚ್ಯಾ ಆದುನಿಕ್ AI,  ಸಂಸಾರಾಂತ್ ಬೋಟಾಂಚಾ ತುದ್ಯೆರ್  ಶಿಕಪ್ ಮೆಳ್ಳ್ಯಾರೀ ಜಿವಿತಾಚಿ ಮೌಲ್ಯಾಂ ಶಿಕ್ಷಕಾಂ ವರ್ವಿಂ ಮಾತ್ರ್ ಮೆಳ್ತಾತ್ ಮ್ಹಣೊನ್ ಜಮ್‌ಲ್ಲ್ಯಾ ಸರ್ವ್ ಶಿಕ್ಷಕಾಂಕ್ ಆನಿ ಕಥೊಲಿಕ್ ಸಭೆಕ್ ಬರೆಂ ಮಾಗ್ಲೆಂ.

      ಉಪ್ರಾಂತ್ ಫಿರ್ಗಜೆಂತ್ಲ್ಯಾ ಸರ್ವ್ ಶಿಕ್ಷಕಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ.

     ವೆದಿ ಕಾರ್ಯಾಂತ್ ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ವಿಜಯ್ ಪಾಯ್ಸ್, ಕಾರ್ಯದರ್ಶಿ ಶ್ವೇತಾ ಪಾಯ್ಸ್, 21 ಆಯೊಗಾಂಚೊ ಸಂಯೋಜಕ್ ರೋಬರ್ಟ್ ಮಸ್ಕರೇನಸ್, ಸಾಂ ಪಾವ್ಲ್ ಕೊವೆಂತಾಚಿ ವ್ಹಡಿಲ್ನ್ ಸಿ| ಜಾನೆಟ್ ಹಾಜರ್ ಆಸ್‌ಲ್ಲಿ.

     ಸಾಂದೊ ಮಾನೆಸ್ತಿಣ್ ಶರಲ್ ವಾಜ಼್ ಹಾಣಿಂ ಶಿಕ್ಷಕಾಂಕ್ ಖೆಳ್ ಖೆಳವ್ನ್ ತೊಡೆಂ ಮನೊರಂಜನ್ ದಿಲೆಂ.

     ಕಾರ್ಯಾಂತ್ ಹಾಜರ್ ಜಾಲ್ಲ್ಯಾ ಸರ್ವ್ ಶಿಕ್ಷಕಾಂ ತರ್ಪೆನ್ ಶಿಕ್ಷಕಿ ಅನಿತಾ ರೊಡ್ರಿಗಸಾನ್ ಅಪ್ಣಾಚಿಂ ಬೊಗ್ಣಾಂ ಉಚಾರ್ಲಿಂ. ಫಿರ್ಗಜೆಂತ್ಲಿ 65 ಶಿಕ್ಷಕಾಂನಿ ಹ್ಯಾ ಕಾರ್ಯಾಂತ್ ವಾಂಟೊ ಘೆತ್ಲೊ.

     ಕಥೊಲಿಕ್ ಸಭಾ ಅಧ್ಯಕ್ಷ್ ಲೂವಿಸ್ ಮಸ್ಕರೇನಸಾನ್ ಜಮ್ಲೆಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ. ಕಾರ್ಯದರ್ಶಿ ತೋಮಸ್ ಮಸ್ಕರೇನಸಾನ್ ಧನ್ಯವಾದ್ ಪಾಟಯ್ಲೆ. ಸಾಂದೊ ರೆನಿಟಾ ಪಾಯ್ಸಾನ್ ಕಾರ್ಯೆಂ ಚಲವ್ನ್ ವೆಲೆಂ.

       Photo Gallery's:  👉🏻 https://drive.google.com/drive/folders/1JHr2T3eaodGM_FRTgTdppUJeynMhDL_M?usp=sharing