ದಿನಾಂಕ್ 20-09-2026 ವೆರ್ ಆಯ್ತಾರಾ ಸಕಾಳಿಂ 10:30 ವರಾರ್ ಸಂಭ್ರಮಿಕ್ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.

     ಮಿಸಾಚೆ ಪ್ರಧಾನ್ ಯಾಜಕ್ ಜಾವ್ನ್  ಫಾದರ್ ಮುಲ್ಲರ್ ಮೆಡಿಕಲ್ ಕಾಲೇಜಿಚೆ ಆಡಳ್ತೆದಾರ್ ಮಾ|ಬಾ|ದೊ| ಮೈಕಲ್.ಎಲ್ ಸಾಂತುಮಾಯೆರ್  ಹಾಣಿಂ "ಆಮ್ಚ್ಯಾ ಜಿಣಿಯೆಂತ್ ಕಷ್ಟ್ ಸಂಕಷ್ಟ್ ಯೆತಾಸ್ತನಾ ಆಮಿ ಮರಿಯೆ ಮಾಯೆಚಿ ದೇಖ್ ಘೆವ್ನ್ ಸೊಸ್ಣಿಕಾಯೆನ್ ಬೊಗುಂಕ್ ಜಾಯ್" ಮ್ಹಳ್ಳೊ ಸಂದೇಶ್ ದಿಲೊ. 

     ಫಿರ್ಗಜ್ ವಿಗಾರ್ ಮಾ|ಬಾ|  ಮೈಕಲ್ ಲೋಬೊ, ಸಾಂ.ರೀತಾ ಆಂಗ್ಲ ಮಾಧ್ಯಮಾಚೆ ಮುಕೆಲ್ ಮೆಸ್ತ್ರಿ ಬಾ| ಅಮಿತ್ ರೊಡ್ರಿಗಸ್‌, ಹಾಣಿಂ ಸಹಭೆಟವ್ಣಿ ಕೆಲಿ.  ಕಥೋಲಿಕ್ ಸಭೆಚ್ಯಾ  ಸಾಂದ್ಯಾನಿ ಮಿಸಾಚಿ ದೇವ್ ಸ್ತುತಿ ಚಲೊವ್ನ್ ಕಾಣಿಕೊ ಭೆಟವ್ನ್  ಭೋವ್ ಭಕ್ತಿನ್ ಮಿಸಾಚಾ ಬಲಿದಾನಾಂತ್ ವಾಂಟೊ ಘೆತ್ಲೊ. 

     ಮಿಸಾಚ್ಯಾ ಅಕ್ರೇಕ್ ವಿಗಾರ್ ಬಾಪಾನಿಂ, ಹರ್ಯೆಕಾ ದಿಸಾ ಸಾಲ್ವೆಕ್ ಯೇವ್ನ್  ಮಿಸಾಂತ್ ವಾಂಟೆಲಿ ಜಾವ್ನ್ ಭಾಗ್ ಫೆತಲ್ಲ್ಯಾ ಸರ್ವ್ ಮರಿಯೆಚ್ಯಾ ಭಕ್ತಿಕಾಂಕ್, ಹ್ಯಾ ದಿಸಾನಿಂ ದಾನ್ ದೀವ್ನ್ ಫೆಸ್ತ್ ಭೋವ್ ಅರ್ಥಾಭರಿತ್ ರಿತಿನ್ ಆಚರಣ್ ಕರುಂಕ್ ಸಹಕಾರ್ ದಿಲ್ಲ್ಯಾಂಚೊ, ಮುಡ್ದೊಮ್ ದಿಲ್ಲ್ಯಾಂಚೊ ಸರ್ವಾಂಚೊ ಉಪ್ಕಾರ್ ಬಾವುಡ್ನ್  ಮಾನಾಚೊ ವಾತಿ ದೀವ್ನ್ ಮಾನ್ ಕೆಲೊ.

      ಉಪ್ರಾಂತ್ ಕಥೊಲಿಕ್ ಸಭಾ ಆನಿ ಗೊವ್ಳಿಕ್ ಪರಿಷದೆಚ್ಯಾ ಮಖೆಲ್ಪಣಾರ್ ಧಾವಿ ಆನಿ ಪಿ.ಯು. ಸಿ. ವಿಭಾಗಾಂತ್ ಡಿಸ್ಟಿಂಕ್ಶನ್ ಆಪ್ಣಾಯಿಲ್ಲ್ಯಾ ಪ್ರತಿಭಾನ್ವಿತ್ ಭುರ್ಗ್ಯಾಂಕ್ ಪ್ರತಿಭಾ ಪುರಸ್ಕಾರ್ ಕಾರ್ಯೆಂ  ಮಾಂಡುನ್ ಹಾಡ್ಲೆಂ. ಪ್ರತಿಭಾ ಪುರಸ್ಕಾರ್ ಕಾರ್ಯಾಚೆ ಪ್ರಾಯೋಜಕ್ ಜಾವ್ನಾಸ್‌ಲ್ಲ್ಯಾ ಮಾನೆಸ್ತಿಣ್ ಗ್ರೇಸಿ ಮಸ್ಕರೇನಸ್ ಅನಿ ಕುಟಾಮ್ ಹಾಂಚೆ ತರ್ಫೆನ್ ನಿಕಿತ್ ಮಸ್ಕರೇನಸಾಕ್ ವಿಗಾರ್ ಬಾಪಾನಿಂ ಉಪ್ಕಾರ್ ಬಾವುಡ್ನ್ ಮಾನ್ ಕೆಲೊ. ಶ್ರೀಮತಿ ಫ್ಲವಿಟ ಫೆರ್ನಾಂಡಿಸ್ ಹಾಣಿಂ ಹೆಂ ಕಾರ್ಯೆಂ ಚಲವ್ನ್ ವೆಲೆಂ. 

         ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್‌ಗಾರಾಂಕ್ ಶ್ರೀ ಅಶ್ವಿನ್  ರೋಶ್ನಿ ಪಿಂಟೊ ಹಾಣಿಂ ಸಾಮ್ವೆಲ್ ಜೊನಾಥಾನ್ ಪಿಂಟೊ ಬಾಳ್ ಫಾವೊ ಜಾಲ್ಲೆ ಖಾತಿರ್ ಬಿರ್ಯಾನಿಚೆಂ ಜೆವಾಣ್ ಆಸಾ ಕೆಲ್ಲೆಂ. ಸರ್ವಾಂನಿ ಜೆವಾಣ್ ಸ್ವೀಕಾರ್ ಕರ್ನ್ ಎಕಾಮೆಕಾ ಫೆಸ್ತಾಚೆ ಶುಭಾಶಯ್ ಪಾಟವ್ನ್ ಫೆಸ್ತಾಚೊ ಸಂತೊಸ್ ದೊಡ್ತೊ ಕೆಲೊ.

       Photo Gallery:  👉🏻 https://photos.app.goo.gl/G4SSgT2pSaiig9sG7